Wanaume na Hofu ya Kupima VVU

Posted on: September 26th, 2018

Uzinduzi wa kampeni  ya Pima, Jitambue, Ishi  Wilaya ya Rombo ulifanyika  siku ya tarehe 25.09.2018 katika viwanja vya stendi ya mabasi Mkuu ikiwa ni kampeni ya Kitaifa yenye lengo la kufikia asilimia 90 ya watanzania ambao wamepimwa  VVU na kujua hali zao ifikapo mwaka 2020 na kundi la kwanza linalolengwa ni wanaume, likifuatiwa na vijana wa kike kuanzia miaka 15 hadi 25 na kundi la tatu ni wanawake wajawazito.

Katika uzinduzi huo Mkuu wa Wilaya ya Rombo, Mhe.  Agnes Hokororo amewaomba wanaume wa Rombo kujitokeza kwa wingi na kupima  hali zao na kuacha kuwategea wake zao kwasababu ni muhimu katika familia au kaya zetu kuhakikisha kila mmoja wetu ametambua afya yake .

“Takwimu za kitaifa zinaonesha wanaume wamekuwa na muitikio mdogo wa kupima VVU na kuwaachia wanawake hasa  wakinamama  wajawazito jukumu la kupima afya zao na wanapokutwa hawana maambukizi  na wao wanajihakikishia kuwa wako salama kupitia vipimo vya wake zao.” Alisema Hokororo

Aliongeza kuwa kuna faida kubwa ya kujua hali ya afya zetu na iwapo ukikutwa na maambukizi kuanza dawa mapema ni mwili kuweza kupambana na virusi vinavyosababisha UKIMWI  na kufubaa mapema hatimaye kupunguza kiwango cha virusi mwilini.

“Ninachukua fursa hii kuishukuru serikali chini ya Wizara ya Afya, Jinsia , Wazee na Watoto  kwa kubuni na kufanya kampeni hii lakini pia nichukue fursa hii kuwaomba sana viongozi wa dini mbalimbali kusaidia kushawishi waumini wao kupima afya ili kufahamu hali zao”, alimalizia Hokororo

Naye Mratibu wa UKIMWI  Wilaya ya Rombo Dkt Agripina Masao alisema kuwa zoezi la upimaji la kitaifa lenye kauli mbiu ya “Furaha yangu; Pima, Jitambue, Ishi” litaendelea mpaka novemba 30 mwaka huu ambapo kiwilaya tumepewa malengo ya kuhakikisha  tumepima watu 6,689.

Ameongeza kuwa zoezi hili lilianza toka tarehe 17 Septemba  na mpaka tarehe 23 Septemba watu 236 walijitokeza kupima na hakuna na aliyekutwa na maambukizi  na zoezi litaendelea kufanyika mpaka Novemba  30 , 2018 kwenye Vituo vya Afya, Zahanati na Hospitali zote zinazotoa huduma ya kupima VVU.

Lengo kuu la kampeni hii ya kitaifa ni kutekeleza mikakati ya kufikia 90 tatu yaani 909090 ifikapo mwaka 2020, 90 ya kwanza ikiwakilisha asilimia ya watu watakaojitokeza kupima VVU na kujua hali zao za maambukizi, 90 ya pili ni asilimia ya watu waliokutwa na maambukizi na kuanza dawa mara moja, 90 ya tatu ni asilimia ya watu wanaotumia dawa kwa uaminifu ili waweze kuwa na kiwango kidogo cha Virusi Vya UKIMWI.