Vyeti vya FDC kupewa Tuzo inayotambulika na NACTE

Posted on: October 13th, 2018

Naibu Katibu Mkuu Wizara ya Elimu Sayansi na Teknolojia Dkt AveMaria Semakafu (waliokaa katikati) akiwa kwenye picha ya pamoja na wahitimu wa chuo cha FDC Mamtukuna kushoto kwake ni Rigamba Mwita kaimu mkuu wa Chuo na Kulia ni Magreth John Mkurugenzi Mtendaji Halmashauri ya Rombo

Dkt AveMaria Semakafu Naibu Katibu Mkuu Wizara ya Elimu Sayansi na Teknolojia amesema vyuo vyote vya maendeleo ya wananchi  (VMW) maarufu kama FDC(Folk Development College) ambavyo vyeti vyake vilikuwa havitambuliki na NACTE mchakato unaendelea na hivi karibuni vyuo hivyo vitaanza kutoa Tuzo zinazotambuliwa na NACTE.

Akizungumza katika mahafali ya 30 ya Chuo cha Maendeleo ya Wananchi Mamtukuna Dkt Semakafu amesema kuwa vyuo vya FDC vimerithiwa na kuwa chini ya wizara ya Elimu, Sayansi na Teknolojia toka mwezi wa pili mwaka jana na ahadi ni kuwa kabla ya mwaka mpya wa masomo kuanza, Tuzo halali zitakuwa zimepatikana na hata kwa wale waliokwishahitimu zitafanyiwa ulinganifu ili  vyeti vyao viweze kupatiwa tuzo zinazotambulika.

“Ukishoka ndani ya Wizara haukubaliki  na maelekezo yamekwishatolewa kwa NACTE na wameshawasilisha andiko la kwanza na muda si mrefu Wizara itakutana nao kupokea wasilisho , ili vyeti vinavyotolewa na vyuo vyote vya FDC  vipewe tuzo inayotambulika na kuwarahisishia wahitimu kujiendeleza mpaka hatua ya shahada”, alisema Semakafu

Naye kaimu mkuu wa chuo cha maendeleo ya wananchi mamtukuna ndg Rigamba Mwita aliwasilisha changamoto ya uhaba wa wakufunzi katika baadhi ya fani kama vile fani ya uchoraji hivyo kuomba wizara iwasaidie kutatua changamoto hiyo.

Akijibu hoja hiyo Dkt Semakafu amesema kuwa wizara imejizatiti chini ya kurugenzi ya ufundi yenye kurugenzi saidizi inayoshughulika na FDC pekee, tayari wameshaona upungufu uliopo wa wakufunzi kulingana na fani zilizopo na linafanyiwa kazi na kushughulikiwa hatua kwa hatua.

Mpaka sasa jumla ya vyuo 54 vya FDC vipo chini ya Wizara ya Elimu,Sayansi na Teknolojia , pamoja na TTC 35, wadhibiti ubora kila wilaya, wadhibiti ubora kanda na wizarani.

Naibu Katibu Mkuu Wizara ya Elimu Sayansi na Teknolojia Dkt AveMaria Semakafu akitoka eneo la mahafali huku akicheza mziki wa furaha