Uongozi ni ubunifu anena Semakafu

Posted on: October 12th, 2018

Naibu Katibu Mkuu Wizara ya Elimu Sayansi na Teknolojia Dkt AveMaria Semakafu akizungumza katika mahafali ya chuo cha Maendeleo ya Wananchi Mamtukuna

Naibu Katibu Mkuu Wizara ya Elimu Sayansi na Teknolojia Dkt AveMaria Semakafu amesema sifa kuu ya kiongozi ni kuwa mbunifu, alipokuwa mgeni rasmi katika mahafali ya 30 chuo cha maendeleo ya wananchi Mamtukuna  leo tarehe 12.10.2018.

Akizungumza katika hafla hiyo ameupongeza uongozi wa chuo pamoja na mwenyekiti wa bodi ya chuo ambaye ni Mkurugenzi Mtendaji kwa  kuwa wabunifu na kutumia wanafunzi wa chuo hicho kufanya kazi zinazoendelea katika wilaya kama vile ujenzi  na ukarabati wa baadhi ya shule na zahanati, ikiwa kama sehemu ya mafunzo kwa vitendo kwa wanafunzi hao.

“Uongozi ni ubunifu sio umekuta kitu kinafanyika Januari hadi Januari ukasema hivi ndivyo inavyotakiwa kuwa , hapana, ukiwa kiongozi lazima uwe mbunifu”, amesema Semakafu

Semakafu amepongeza jitihada zilizofanyika za  kuongeza  fani zinazofundishwa katika chuo hicho kutoka fani mbili mpaka kufikia fani nane na mchakato wa chuo wa kuongeza  fani nyingine mbili za uchomeleaji vyuma na fani ya kuongoza watalii (Tour Guide).

Wilaya ya Rombo ina njia ya Rongai kwenda Mlima Kilimanjaro hivyo uanzishwaji wa fani ya kuongoza watalii ipewe kipaumbele kwani inaweza kukipa chuo wateja wengi  na kwa haraka, aliongeza Semakafu

Awali  Kaimu Mkuu wa chuo hicho Ndg Rigamba Mwita akisoma taarifa ya chuo , ametaja mipango ya chuo hicho ni kuongeza fani ya uchomeleaji vyuma pamoja na fani ya kuongoza watalii kama watapata usaidizi pamoja na kuandaa mafunzo ya muda mfupi  ya matumizi ya biogas kwa wananchi wa Rombo na viunga vyake ili kusambaza teknolojia rahisi inayoweza kuokoa misitu.

Aliongeza kuwa ,tayari chuo  kinatumia nishati ya Biogas baada ya kufanikiwa katika zoezi la majaribio yaliyofanyika kwa ushirikiano wa Halmashauri ya Rombo na Manispaa ya Alyvnsbyn.

Naibu Katibu Mkuu Wizara ya Elimu Sayansi na Teknolojia Dkt AveMaria Semakafu(wa pili kushoto wakifurahi kwa pamoja na Mkurugenzi Mtendaji  wa Halmashauri ya wilaya ya Rombo Magreth John( kulia) na Kaimu Mkuu wa chuo Rigamba Mwita (kushoto)