Umeme Rombo 100%

Posted on: November 8th, 2019

Nia ya serikali ya kufikisha umeme katika kila kijiji imeshatimia katika wilaya ya Rombo ambapo mpaka sasa asilimia mia moja (100%) ya  kata zote na vijiji vyake  vimeshaguswa na umeme.

Hayo yamezungumzwa na Meneja wa TANESCO wilaya ya Rombo  Eng. Hassan Lumuli katika kikao cha baraza la madiwani  tarehe 8 Novemba 2019 kilichofanyika katika ukumbi wa mikutano wa Halmashauri ya wilaya.

Aidha ameeleza kuwa  kwa kipindi cha kuanzia Januari  hadi Oktoba 31, mwaka huu , jumla ya wananchi  2,842 wameunganishiwa  na huduma hiyo  ,huku  jumla kuu  mpaka kufikia Oktoba 31,2019 wananchi  25,346  wameunganishiwa umeme , ikiwa ni idadi ya nyumba/kaya  zilizounganishwa.

Pamoja na hilo ameliambia baraza kuwa wananchi ambao bado hawajaunganishiwa umeme, wanaweza kuunganishwa na huduma hiyo kwa bei elekezi ya serikali ya shilingi 27000 tu kwa maeneo ya vijijini.

 Katika hatua nyingine  Eng. Lumuli ametoa rai kwa wananchi kutokuwa na hofu ya kufungua viwanda kwa sababu TANESCO  Rombo bado ina uwezo wa kuwahudumia , ikiwa na kiasi Megawatt  1.5 za  umeme ambao hauna matumizi  ,ambapo  Matumizi makubwa ya umeme katika Wilaya ya Rombo ni Megawat 3.0, lakini Uwezo  wa line ya kulisha umeme ni Megawat 4.5.