Ujenzi wa daharia kutatua tatizo la wanafunzi kutembea umbali mrefu

Posted on: July 11th, 2019

Ujenzi unaoendelea wa daharia katika shule ya sekondari Motamburu utawarahisishia  wanafunzi waliokuwa wanatembea umbali wa kilometa 12 hadi 27 kufika shuleni hivyo kupunguza mazingira hatarishi kwa wanafunzi  ambayo yanasababisha mimba za utotoni, ajali kutokana na matumizi ya usafiri usio rasmi na utoro.

Mradi huo ambao ulikuwa umepangwa kutekelezeka kupitia ufadhili na michango ya wananchi ulikadiriwa kugharimu kiasi cha shilingi milioni 194,775,684, mpaka sasa upo katika hatua nzuri baada ya Serikali kupitia Wakala wa Huduma za Misitu Tanzania( TFS) kufadhili mradi huo kwa kuchangia kiasi cha  kiasi cha shilingi 150,000,000.

 Kwa upande wa ushiriki wa wananchi katika mradi huo  ni upatikanaji wa eneo ambalo lina gharama ya shilingi 10,000,000 ambapo kujengwa kwa daharia hiyo kutawanufaisha wanafunzi  wanaosoma katika shule hiyo kutoka katika maeneo ya Nalemuru,Endonet na Kamwanga.

Mpaka sasa kazi zilizobakia katika ujenzi huo ni kuweka dari, vioo  na kupaka rangi.  Daharia hiyo ina  vyumba  20 vya kulala wanafunzi  ambapo kila chumba kinachukua wanafunzi  wanne, hivyo ina uwezo wa kuchukua wanafunzi 80 wa bweni.

Ujenzi huo pia  umezingatia uwepo wa nyumba ya matroni na miundombinu muhimu na rafiki kwa wanafunzi wenye mahitaji maalumu  vitu vitakavyosaidia kuwalinda watoto wa  kike na kuinua maendeleo ya kitaaluma katika shule hiyo ambayo mpaka sasa ni ya wastani kutokana na wanafunzi kutohudhuria masomo ipasavyo.