Rombo tumependelewa-Hokororo

Posted on: January 29th, 2020

DC Hokororo akizungumza na wadau wa Elimu

Mhe. Mkuu wa Wilaya ya Rombo Agness Hokororo amesema kuwa  wilaya ya Rombo imependelewa na Wizara kwa kuletewa fedha za kutekeleza miradi  miwili ya elimu kwa mwaka 2019, ikiwa ni milioni 152 za kujenga ofisi za udhibiti ubora wa shule  na milioni 500 za kukifanya upya chuo cha maendeleo ya wananchi Mamtukuna kilichokuwa chini ya Maendeleo ya Jamii  ambacho kwa sasa kinasimamiwa na wizara.

Hayo ameyazungumza katika halfa fupi ya ufunguzi wa Ofisi ya udhibiti ubora wa shule uliofanyika mapema leo Januari 29,2020

Ameongeza kuwa serikali  ipo mstari wa mbele kuwaletea wananchi maendeleo  kwa kuimarisha miundombinu mbalimbali katika sekta za elimu,afya ,barabara na umeme bila kujali itikadi,rangi dini wala ukabila na wananchi wa wilaya ya Rombo ni wanufaika.

Katika hatua nyingine Hokororo amewataka wadau wa elimu kutoiona ofisi ya udhibiti ubora wa shule kama washitaki ,bali wafanye kazi kwa kushirikiana kunyanyua kiwango cha elimu na ufaulu kwa wilaya  kwa kuboresha mazingira ya kufundishia na kusomea kwa walimu na wanafunzi.

Naye mdhibiti ubora kanda  amesema kuwa suala la udhibiti ubora ni mfumo unaoangalia viwango vya elimu na kazi hii inafanyika kwa ushirikiano kuanzia ngazi ya shule ambapo mdhibiti ubora ni mkuu wa shule akishirikiana na baadhi ya walimu, wadhibiti ubora wengine ni  Afisa elimu kata, Afisa Elimu(Wilaya) Afisa Elimu(Mkoa) ,wote kwa pamoja wanashirikiana kuhakikisha shule zinafanya vizuri na kuwa na ufaulu wa kutosha

Akisoma taarifa fupi ya mradi Mdhibiti ubora wa shule W amesema kuwa wilaya ya Rombo ni miongoni mwa wilaya 100 zilizopewa fedha ya kujenga ofisi za Udhibiti ubora wa shule Tanzania ambapo kwa kanda ya kaskazini yenye jumla ya halmashauri 18 Rombo ni Miongoni mwa wilaya 10 zilizofanikiwa kupata fedha za ujenzi .